夏天就快到啦，你地霖好去边度玩未啊？不如跟我去赤坭啦~
赤坭，听个名就带住一股田园气息，佢的确系一个好靓嘅地方。
夏天嘅赤坭都有好多好玩嘅嘢，唔信？依家就跟住我去赤坭睇下啦~
宝桑园
地址：广州市花都区山前大道(近缠岗村收费站)
夏天来到赤坭，首先就梗系要去宝桑园摘桑果啦，仲可以去睇下d蚕宝宝点样食桑叶~
宝桑园新生态农业科普基地坐落于山前大道，系以蚕桑文化为核心，集现代农业、都市农业同生态农业为一体。
以休闲观光、科普教育为主嘅新生态农业旅游示范基地。
系宝桑园里面可以见到，新生嘅桑叶翠绿欲滴，随风轻摆。
桑叶下果d三五成聚嘅桑葚，一串串挂系枝头，游客可以亲手摘低果d颜色从粉红到深紫，一粒粒饱满殷实嘅桑果。
摘完桑果，仲可以去到蚕宝宝体验馆，睇下d蚕宝宝。
仲可以亲手喂养佢地，感受佢地食桑叶嘅乐趣，果d“唦唦”声形成一曲神奇嘅乐章。
园区系14年就引进咗动感5D电影、恐怖城、旋转木马、湖中游船、颠倒屋等等娱乐项目。
依家夏天来到宝桑园，仲可以玩水清凉一下~
御盛马场
地址：广州市花都区赤坭镇锦山村
来到赤坭，除咗有桑果摘之外，仲可以去“策马奔腾”~
御盛马场，占地1045亩，场内有五十几匹马，系花都首个以马术运动为特色，集观光、休闲、餐饮、旅游及生态环保教育于一体嘅休闲娱乐场所。
系呢度，你可以去沙圈驰骋、骑马游山，仲有马术教学。
骑完马仲可以去钓下鱼同烧烤，晚上可以系木屋过夜，感受呢度夏天嘅气息。
志惠农场
地址：花都区志惠农场（赤坭镇蓝田村748乡道）
夏天来赤坭，我觉得去志惠农场就最啱了，系大雁湖嘅玻璃桥上吹下清凉嘅夏风，感受一下传说中嘅7D玻璃桥！
广州首座7D高空玻璃桥，大雁湖全长268米，宽2米多，距离水面48米，由七彩云梯、7D玻璃吊桥、桥头滑道组成。
系集颜值、体验、刺激为一体的高空玻璃桥。
桥嘅一边，碧绿嘅湖面延伸到远处，连接住郁郁葱葱嘅乔木，系办公室坐耐咗，望到呢一片翠绿，瞬间感觉清爽自在。
志惠农场占地1000多亩，除咗新引进嘅广州首座玻璃吊桥之外，呢度本来就山清水秀，风景宜人，系花都人休闲观光嘅不二之选~
呢度除咗有新引进嘅玻璃桥同花海之外，仲有得意好玩嘅游乐体验~
坐上海盗船同太空漫步，系半空中吹住清凉嘅微风，放低疲惫，俯瞰一下身边嘅美景！
仲有恐龙谷模拟侏罗纪时代，中意恐龙嘅大朋友，小朋友们唔好错过啦~
听“恐龙”系山间吟叫，感受远古生物嘅神奇魔力，近距离观看仲可以学习科普知识，可以让小朋友边玩边学。
夏天来志惠农场玩就最啱啦~
九曲河
我觉得赤坭九曲河都系一个好啱夏天游玩嘅地方。
呢度仲有一个好有诗意嘅名：“巴江渔歌，九曲画廊”。斋听个名都觉得靓爆镜！
而且呢度好适合踩单车，夏天来到九曲河边，沿住河堤绿道踩单车，运动嘅同时感受河风扑面，简直惬意十足。
来一次赤坭，梗系要试下本地嘅特产啦！夏天嘅赤坭有咩正嘅土特产呢？
白石一点红
讲起食红薯，又点可以唔提我哋白石村嘅一点红呢！
一点红比其他品种嘅番薯更加“有心”，，口感比一般番薯要香甜软糯。“一点红”得名于番薯中间嘅“斑点”。
种系山地嘅黄泥里面，特殊嘅地理环境，令到番薯更加粉甜。呢种番薯，放入电饭锅蒸熟最好食，原汁原味。
门口坑粉葛
门口坑系著名嘅家禽同水产养殖村，大盘粉葛闷鹅就系出自呢度嘅一道名菜。呢度出产嘅粉葛系“花都十佳农产品”之一
门口坑村种出来嘅粉葛外形呈标准榄形，葛沟纹少面浅，皮薄且光滑，肉质白，味甘甜，每年产量都有上万斤。
蓝田黑花生
黑花生，全名叫富硒黑花生，系蓝田村嘅新农作物同特产，属于国内外首创的新型农产品。
黑花生表面睇来好似无咩特别之处，但系入面嘅花生肉同普通红衣花生有住巨大差别。
同红花生相比较，黑花生具有更高嘅营养价值。
国泰木瓜
赤坭镇国泰村出咗名盛产木瓜，呢度嘅木瓜清甜水分多，系绿色无公害水果。
呢种木瓜用报纸裹住，放入冰箱，可以保存一个月。
锦山红柿
锦山村种植大红柿有近200年嘅历史，呢度嘅红柿果大，皮薄，红润通透，无核，甜润，口感好。
赤坭有咁多嘢玩，又有咁多嘢食，呢个夏天一于去赤坭了喂！
留言互动
夏天到了，你最想去赤坭哪个地方玩呢？
留言告诉撑家姐啦~