琴日，本来唔系好关注奥斯卡嘅我，喺微博同朋友圈睇完奥斯卡嘅全程直播，而奥斯卡嘅颁奖乌龙亦都成为咗全民话题，霸屏咗大半日。
作为围观群众嘅我哋，全程嘅表情如下——
川普都可以当选美国总统，一个世界性颁奖典礼都可以搞咁大个乌龙，你话仲有咩冇可能发生！
作为一个粤语头条号，首先允许我科普下“乌龙”一词嘅来历。
广东民间有一个传说：久旱之时,人民祈求青龙降下甘露，以滋润万物，点知青龙未至，反而系乌龙现身，为人间带嚟灾难，自此有“自摆乌龙”嘅说法，乌龙就有“搞错、糊涂”嘅意思。
六七十年代，香港球迷根据英语单词“own goal”（自入本方球门嘅球）嘅发音,将其称为“乌龙波”，“乌龙”一词就被引申为球场用语。
科普完毕，回归主题，今日我哋嚟讲下香港电影之中经典嘅“乌龙”。
香港电影经典“ 乌龙 ”之笑场
拍戏笑场其实好常见，特别系拍喜剧片，演员拍戏嘅时候，自己往往都会忍唔住笑，呢点系星爷身上就体现得淋漓尽致。
星爷早年嘅电影之中，时不时都会有自己嘅笑场镜头，细心嘅影迷都会发现。
其中最经典嘅分别系《大内密探零零发》同《少林足球》。
《大内密探零零发》之中，法印（罗家英 饰）被琴操虐打，最后打到墙上边，估唔到法印嘅假发跌咗落嚟。
而罗家英非常聪明咁补咗一句——“好难捉摸啊！”，星爷忍唔住转身笑咗出嚟。
镜头嘅最后，我哋可以发现连罗家英本人都忍唔住偷笑。
假发跌落同埋星爷嘅偷笑，完全系个“乌龙”，剧本原先系冇噶。
后来根据导演所讲，呢场戏一共拍咗9次，每次大家都忍唔住笑，最后就选咗呢次对白、表演都 最自然嘅表演，剪入正片，结果喜剧效果好好。
《少林足球》入边，大力金刚腿（周星驰 饰）同铁头功（黄一飞 饰）为咗生计，要去夜总会卖唱，两个人喺舞台上大唱“少林功夫好嘢……”
两个人基本上系即兴发挥，搞怪对唱，期间星爷三次笑场。
一直拍到最后“哇你个头”，两个人都忍唔住笑场。
本来呢个镜头系弃用，由于后来睇返真系太好笑，星爷后来都系采用呢段，结果效果更好。（星爷同黄一飞当年凭借《少林足球》分别获得金像奖最佳男主角同最佳男配角。）
除咗星爷本人经常会笑场，星爷电影入边其他演员都会，八两金喺《食神》之中，好明显讲错台词兼笑场。（隔离阿个一样都笑咗）
香港电影经典“ 乌龙 ”之导演玩嘢
有啲导演拍戏嘅时候，会对演员“玩嘢”，制造“乌龙”嘅同时，令到表演产生更多化学反应，最经常用嘅就系特登唔嗌cut！
呢度又要讲返星爷，星爷嘅《西游降魔篇》入边扮演空虚公子侍女嘅四个阿姨咪好搞怪好鬼马咩，成日窒空虚公子。
其实最后空虚公子死嗰段戏，星爷特登冇嗌cut，等阿姨自己重复讲对白——
“你早说啊……你为什么不早说……你为什么不早说……你应该早说……”
呢段经典又魔性嘅对白就咁诞生，同时都成为电影嘅精彩情节之一。
《东成西就》之中，哥哥同梁家辉一样被导演玩过，佢哋两个跳完经典嘅《双飞燕》之后，本来应该完咗，两个人都定格唔郁。
然后导演就一直唔嗌卡，两个人唯有一直维持呢个动作，郁都唔咁郁，结果最后两个好明显震下震下，一齐笑场，呢段仲被保留咗，剪入正片。
香港电影经典“ 乌龙 ”之演员加戏
呢度所讲嘅“加戏”并唔系贬义词，反而系指演员进入角色之后，会不自觉加入细节表演，令到角色更加饱满，起到画龙点睛嘅作用。
最经典嘅莫过于《无间道》之中，黄志诚临死之前同陈永仁最后一次见面，两人分别之前，黄志诚脱口而出一声“喂”。
黄志诚叫住陈永仁，但最后咩都冇讲。几分钟之后，陈永仁见到黄志诚嘅尸体，令人唏嘘。
呢一段戏系黄秋生临时加嘅对白，连梁朝伟都冇反应过嚟。
而呢段对话配合几分钟之后阴阳相隔嘅剧情，令到嗰一声“喂”好似包含无从说起嘅千言万语，令到《无间道》嘅影迷迷恋对其进行解读。
而无论呢几句对白究竟有冇深意，影迷解读出啲咩，呢段临时加嘅戏都系《无间道》当之无愧嘅经典片段之一。
《甜蜜蜜》之中，豹哥（曾志伟 饰）被枪杀，李翘（张曼玉 饰）去认尸嘅镜头，其实系一个“乌龙镜头”，但系佢最后成为全出戏之中最精彩嘅镜头。
由于豹哥被爆头，李翘要求将尸体翻过嚟进行辨认，尸体一翻过嚟，李翘突然开始笑。
后来慢慢由笑转喊，喊到梨花带雨。
李翘之所以一开始笑，系因为见到豹哥后背嘅纹身，上面系左青龙右白虎，中间有只米老鼠。
呢只米老鼠纹身对应咗两人第一次见面，李翘讲自己最怕老鼠，所以豹哥特登去纹咗一个米老鼠。
张曼玉呢段先笑后哭嘅表演，同电影前面嘅剧情首尾呼应，令到李翘呢个角色更饱满生动。而呢段戏系张曼玉自己进入角色之后，发自内心表演出嚟，并非剧本设定。
香港电影经典“ 乌龙 ”之道具错漏
电影拍摄期间经常出大大小小嘅意外，演员受伤都系家常便饭，不过有时一啲道具嘅错漏，都会危害到演员嘅生命安全。
谢霆锋拍摄《新警察故事》嘅时候，有一场戏系要畀吴彦祖活捉，然后被悬空挂吊喺会展外墙。
为咗拍摄效果，谢霆锋亲自上阵，其实当时条绳真系一直勒住谢霆锋条颈。
根据谢霆锋回忆，当时开拍冇几耐，佢就感觉到窒息，成只眼都系*血丝红**，吓到工作人员即刻为佢松绑，唔系佢差啲窒息致死。
呢边谢霆锋试过真·窒息，嗰边吴镇宇都经历过真·爆头！
《朱丽叶与梁山伯》之中，佐敦（吴镇宇 饰）同新界安（任达华 饰）讲数，期间新界安手下肥彭（林雪 饰）突然攞起个酒樽就爆佢头。
拍完之后，大家先发现吴镇宇头上嘅血系真嘎，林雪攞咗个真樽爆 头，而吴镇宇一直冇出声，一直忍住剧痛完成拍摄。
讲咗咁多香港电影之中嘅“乌龙”，其实我只系想讲——
拍摄期间“乌龙”系不可避免，但系再大嘅乌龙，都抵挡唔住敬业又有实力嘅演员表演，做人做事最重要嘅，系敬业负责嘅态度。
有时候，并唔系“乌龙”成就经典之作，而系演员嘅努力令到“乌龙”成为一样经典。
素材出自知乎、百度贴吧等
羊城网负责整理编辑
