韦利复出踢中超嘅江苏苏宁？唔系啩！中超球队真系有钱到儍咗？竟然搵个差唔多挂咗靴七年、43岁嘅大叔复出！虽然系韦利亲口讲，但内地网民都唔信，当笑话咁睇，有人调侃话：「你哋签埋巴迪斯图达返嚟，我从此就做苏宁球迷！」
减完磅都近190斤
43岁嘅韦利几日前喺ig话：「早晨，你哋嘅Bobo返嚟嘞，我决定去中国踢波。五个月前，我有101公斤重，家阵减咗10公斤，我会再接再厉，减到89公斤！」意大利《米兰体育报》指韦利同苏宁倾紧转会，好快有结果，虽然呢份报章强调唔系讲笑，但内地网民唔多信，当系笑话。
有个叫李香兰嘅网民话：「你哋签埋巴迪斯图达，我从此做苏宁球迷！」网民弦歌微雨就话：「我只要马勒当拿同朗拿度。」好多人仲想睇比利、碧根鲍华等复出踢中超；更有网民拎死人嚟开玩笑，话迪史提芬奴热紧身，准备嚟中超，李惠堂亦会还阳加盟广州恒大喎。正经少少嘅网民就话中超唔系老人院，闹苏宁人儍钱多，韦利踢中超会系对联赛最大嘅讽刺。记者亦抱怀疑态度，苏宁嘅转会策略系高价买当打球星，例如阿历士泰斯拿同拉美利斯，点会突然签老鬼呢？同埋韦利只系讲去中国踢波，冇话系中超定中甲，可能只系嚟中国踢啲商业性或慈善性嘅友赛都唔定。
男女通杀万人迷
可能年轻球迷唔太认识韦利，等我求大侠介绍番。韦利系前意大利国脚前锋，当打嗰阵好似坦克车，头顶脚踢都冇问题，劲过杜奥巴。99年佢由拉素转会国际米兰嗰阵刷新当时转会费纪录，身价达4,900万欧元，之后喺国米仲做过意甲神射手。外号Bobo嘅韦利好受球迷欢迎，本身系花花公子，「食」女无数，但外界一直怀疑佢嘅性取向，因为佢同意大利前锋拍档恩沙基关系好到情侣一样。
其实球坛有唔少复出嘅先例，最近港超嘅标准灏天请到卓卓出山；英格兰射手舒宁咸旧年亦挂靴七年后复出，喺史提芬纳治做球员兼领队。超过40岁仲踢紧嘅名将，有三浦知良、舒华沙同薛罗拔图等
