图、文：Jason Yip @SLAB hk
相信已投身社会工作的7、80后，大多都少咗做运动，偶然有冇挂住求学时期上PE堂嘅日子？
仲记得以前上 PE 一定要着全白色波鞋，校规写到明冇得唔守，但以前除咗街市买对不知名嘅白布鞋外，都冇乜其他选择，边有而家NIKE、ADIDAS、CONVERSE、REEBOK 等各大品牌都出唔少白波鞋俾学生哥选择咁幸福吖。
90年代着白鞋如果要出色过人，就必攻 YASAKI、KAMACHI 同埋国产“回力”，死悭死抵唔食lunch都要买对傍身！笔者自小热爱篮球，现时亦都系一位波鞋收藏家，去年暑假亦都举办过波鞋展览。
记得有传媒朋友问我最钟意边五对波鞋，除咗专栏早前提及过嘅asics三井寿战靴外，其中一对我选择国产“回力”篮球鞋。有读者曾经同我交流时讲过以下说话 …
“回力系我哋中小学嘅名牌，PE 堂着住佢觉得威过其他同学。”
“我以前都系着住回力追女仔，仲买多对俾佢一齐着返学。”
“我对回力着咗两日就甩底，返到屋企仲俾阿妈闹到喊！”
“回力系当年校园潮流，人有我都要有。”
每个人心目中都有回力。唔系贵嘢就一定系好，一对几十蚊嘅回力波鞋，佢对我嚟讲系代表住一个时代，一个属于我嘅黄金时代，陪伴征战街场，燃烧青春花火。如果 AIR JORDAN 1 开启了篮球之神 Michael Jordan 嘅传奇，咁回力就系我打开篮球生命嘅门匙，直到现时为止我出街都有着回力！
眼见波鞋炒风盛行，有人更为咗对鞋以身犯险。其实一对过千元嘅波鞋，同一对几十元的波鞋都可以着得好睇，年青人记住要量力而为，唔好盲目追捧潮流，因为你自己本身都可以创造潮流。
Be Yourself , Be Different.